Háhýsin í Lundi

Ormurinn komst áðan í Fasteignablað Moggans frá því í gær og las þar lofgjörð byggingarfulltrúans í Kópavogi um nýja hverfið í Fossvogsdalnum.

Bloggari hefur eitt að segja um það mál: Háhýsin rísi - litboltann burt!

Að sjálfsögðu vilja nágrannarnir helst lágreist rað- og parhús (en slíkt húsnæði vantar sárlega á höfuðborgarsvæðinu). Á móti kemur þegar byggt er svo hátt er hægt að ná góðu nýtingarhlutfalli, samhliða stóru túni í kringum blokkirnar. Tenging svæðisins við gatnakerfið er eins og best verður á kosið, þar sem gatnamót Nýbýlavegar og Hafnafjarðarvegar eru rétt við túnfótinn.

Þar sem margir eru til í að þétta byggð víðast hvar, nema í eigin hverfi, er rétt að spyrja bloggara:

Er hann tilbúinn að samþykkja þéttingu byggðar vestast í Vesturbænum?

Þokkalega! Ekki að þar sé mikið pláss, en þó stendur til að byggja á gömlu Lýsislóðinni og gamla SÍF-húsið (þvottahús Grýtu) ætti að rífa sem fyrst og byggja þar blokk. Úti fyrir norðurströndinni á svo Gufunesið að koma skv. kosningaauglýsingum.

Einfaldast í stöðunni væri samt að byggja þar sem KR-svæðið er núna við Frostaskjól. Þar mætti væntanlega koma fyrir um 300 íbúða byggð í 4-7 hæða húsum.

Ofnarnir á Nesveginum

Svo virðist sem lestur á nánast hverjum einasta lagnafréttapistli í 6 ár komi bloggara að litlum notum þegar kemur að því að stilla hitann í risinu á Nesveginum. Vissulega kann Ormurinn heitin á túr- og retúrloka og þekkir virkni þeirra í öllum grundvallaratriðum. En þegar kemur að því að stilla hitann í íbúðinni (5 ofnar x 2 lokar á hverjum ofni + miðstýrður stillingabúnaður og opnanlegir gluggar) þá þarf eitthvað miklu meira til.

Hver veit samt nema Ormurinn verði orðinn flinkur í stillingum eftir nokkra mánuði?

en ek heiti Sverrir 15:48

¿Asnalegasta vínflaska í heimi?

Ormurinn rakst á þýska heimasíðu Kalahari Thirstland líkjörsins. Flaskan var hreinlega of fallísk til þess að hægt væri að sniðganga hana í flughöfninni í Jóhannesarborg. Ekki það að hinn görótti drykkur reyndist góður, það var öðru nær. En hann hefur vissulega sérstöðu í flokki líkjöra.

Árshátíð

Bloggari mætti galvaskur á árshátíð Skólafélags MR á fimmtudaginn. Það var 6.X sem bauð stjörnufræðikennaranum í mat á Hótel Íslandi og í teiti í Grafarholtinu. Kynnirinn á árshátíðinni, Sveinn Waage, var trúlega sá slakasti sem Ormurinn hefur kynns. Miðað við frammistöðu hans þarna, væri hann vart tækur á morgunvakt FM 957, hvað þá meira.

Árshátíðarmyndin þetta árið var ansi sniðug og var gott að ljúka skemmtuninni með henni. Menn og konur voru síðan hin kátustu í teitinni í Grafarholti. Segir það kannski sitt um gestrisnina á þeim bænum, að heimilisfaðirinn skutlaði kennara og þremur nemendum niður á Hótel Ísland. Þar sem undirritaður hafði áskotnast miði á ballið frá Hringi, hringjara skólans, lét hann slag standa og mætti á ballið. Eftir að hafa staðið í röð í tæpa klukkustundkomst undirritaður inn á ballið, rölti þrjá hringi um húsið og tók sér svo far með leigubíl vestur á Nesveg.

Þjóðskrá

Breytt heimilisfesti er komin inn í þjóðskrá, ef marka má heimabanka sparisjóðanna.

en ek heiti Sverrir 20:05

Kökutími

Kennarinn er ábyrgðarlaus í dag. Nú stendur yfir kennslustund í X-bekknum, þar sem nemendur og kennari háma í sig Rice Crispies köku sem lítur út eins og sólin og aðrar tvær sem sýna reikistjörnurnar.

Ótrúlegt hvernig nemendunum tekst að sameina át og fræðslu.

Rétt í þessu ákvað síðasti geitungurinn að bjóða sér í kökuboðið en sá þurfti síðan frá að hverfa.

Í kvöld bregður Ormurinn svo undir sig betri fætinum og mætir á árshátíð Skólafélagsins.

en ek heiti Sverrir 12:42

Mánudagsblogg

Nú er liðin rúm vika á Nesveginum og er óðum að koma mynd á íbúðina.

Ekki er enn komin nettenging en vonir standa til að netþjónusta Búnaðarbankans, binet, bjargi því.



en ek heiti Sverrir 12:54

Árla dags

Bloggari er snemma á fótum í dag, miðað við að skólinn hefst ekki fyrr en hálfellefu. Ástæður þess eru ekkert sérlega skáldlegar: Skil á heimadæmum og skúffukökubakstur.

en ek heiti Sverrir 08:29

Flutningar

Nú viðrar vel til flutninga í risíbúðina á Nesvegi 66.

Kvöldið í kvöld verður fyrsta kvöldið á Nesveginum. Íbúðin sem bloggari flytur nú í er 6. staðurinn sem hann býr á. Fyrstu tvö æviárin bjó hann í risíbúð í Barmahlíð 5 og svo í fimm ár á Háteigsvegi 28 (jarðhæð). Síðan fluttist fjölskyldan í kjallarann í Eskihlíð 11 árið 1985 og Ormurinn hóf skólagöngu sína í Hlíðaskóla. Það var svo árið 1989 að hann flutti á Lynghaga 24 (1. hæð) og hefur hann búið þar síðan, að undanskildum vetrinum 2000-2001 þegar hann leigði með Jónatani íbúð á 2. hæð á Reynimel 39.

en ek heiti Sverrir 13:32

Tiltekt

Parið lauk við að mála í gær og á nú bara eftir að þrífa íbúðina hátt og lágt á morgun. Flutningar verða upp úr hádegi á laugardag.

Tiltektin hefur náð fullum skriði. Í gær var tekið til í gömlu Hagaskóladóti og m.a. hent glósum úr þeim ágæta reyfara K´s First Case, hvern bloggari nam undir stjórn Jónu Hansen. Einnig rakst Ormurinn á dönskuglósur áðurnefnds kennara, en þær fær Eyjólfur, sem nú þarf að vinna upp 8. og 9. bekk í dönsku.

Tíðindi úr spurningaheiminum

Yngsti spurningabróðirinn var í sigurliði í spurningakeppni Frosta(skjóls) í gær. Það lið er á leið í spurningakeppni félagsmiðstöðva, sem haldin verður í vetur (m.a. á Rás 2 skv. óstaðfestum heimildum).

Annars eru ýmsir skólar farnir að huga að undirbúningi Gettu betur. Bloggari telur allt benda til þess að Örn Johnson sé að smala saman liði hjá Hraðbrautinni og ætli þar m.a. að nýta krafta manna sem hafa verið í grunnskólaliðum síðustu árin. Þar myndast þó trúlega seint hefð, enda skólabragurinn full-kúristavænn, ásamt því að nemendur eiga að ljúka honum á tveimur árum.

en ek heiti Sverrir 14:37

Vatnsberinn

Eyjólfur var að horfa á gamla vídeóspólu áðan, hvar á var heimildarmyndin „Vatnsberinn“ frá 1989.

Að heyra Rúrik Haraldsson tala um bág kjör Sæfinns með sextán skó og annarra vatnsbera er mögnuð upplifun. Það er heldur ekki eins og handrit Baldurs Hermannssonar minnki dramatíkina.

en ek heiti Sverrir 16:26

Lakkgrís

Nú geta gestir speglað sig í nýlökkuðum körmum, hurðum og þröskuldum á Nesveginum. Þá er eftir að telja þau þrekvirki sem Haraldur Hrafnsson hefur unnið á meðan ungmennin hafa dundað sér við lökkun. Enn er þó eftir að bera málningu á nokkra fermetra, að ógleymdum þrifum fyrir laugardaginn.

Spenningurinn vegna flutninganna við það að verða óbærilegur.

en ek heiti Sverrir 00:30