Miðvikudagsbloggið hið minna

Jæja.

Langt er um liðið síðan Ormurinn bloggaði síðast svo það er best að koma sér að efninu hið snarasta.

Jafnframt þakkar undirritaður heillaóskir í tilefni afmælisins. Tuttugasta og fimmta aldursárið fer vel af stað. Nú getur bloggari klætt sig eins og alvörustjarnvísindamaður (mínus flíspeysan og gallabuxurnar).

Afmælisdagurinn

Fyrri hluti dagsins var hefðbundinn skóladagur en þó með frjálsri mætingu hjá 10. bekk. Tveir mættu í stærðfræðitímann (annar átti einnig afmæli) og fengu sér köku úr bakaríinu (já, Ormurinn hreinlega nennti ekki að baka á fimmtudagskvöldið). Níundubekkingar hámuðu hana svo í sig í síðasta tímanum. Eftir að hafa verið beðinn um að gera „eitthvað skemmtilegt“ í tímanum í tilefni afmælisins ákvað hann að leyfa þeim að reikna stærðfræði. Það er greinilegt að kynslóðirnar leggja ekki alveg sama skilning í orðið „skemmtilegt“.

Bloggari fór upp í nýju höfuðstöðvarnar Orkuveitunnar (a.k.a. Helstirnið )seinni partinn sem safnnördi í félagsskap besta og frægasta bloggarans. Húsið er glæsilegt en ekkert sérlega hentugt fyrir lofthrædda. Ferð í lofthræðslulyftu upp á 4.hæð gekk þokkalega eftir ráðleggingar Stefáns um að mæna á lyftuvegginn en á leið niður fundu félagarnir nýja lyftu sem var inni í öðru húsinu en ekki í lestinni (nýgerv.).

Um kvöldið var harðkjarnanum (5 manns) stefnt á Lynghagann, hvar skyldi grilla. Það er samt ljóst að næst verður grillið (´86) ekki þakið að þremur áttundu hlutum með kartöflum sem tekur 45-60 mínútur að grilla. Eftir ár og öld rötuðu hamborgarar og grillkjöt á borð þolinmóðra gesta en í eftirrétt var boðið upp á ljúffenga banana með súkkulaði og rjóma.

Laugardagurinn

Dagurinn hófst á því að bloggari hélt á léttu hlutunum fyrir Ögmund og Ólöfu í flutningum þeirra niður í bæ. Svo tók við vakt á Minjasafninu og um kvöldið var kórteiti í Grafarvoginum. Ormurinn fékk nett menningarsjokk þegar hann sá ofnana ofan í gólfunum og falið bassabox í eldhússinnréttingunni. Annað var innanhússhannað eftir þessu.

Sunnudagurinn

Einu sinni sem oftar var sunnudagamatur hjá afa og ömmu. Falski hérinn stóð vel fyrir sínu og ekki spillti fyrir að bræðurnir fengu að brúka silfurhamarinn til að brjóta niður páskaegg í eftirrétt. Það var stemmning.

Sumarkveðja

Bloggari var beðinn fyrir sumarkveðju til foreldranna suður frá. Eftir skamma íhugun fattaði hann að þar er að koma haust og síðan vetur.

en ek heiti Sverrir 14:12

Afmæli

Tuttugasta og fimmta aldursárið er gengið í garð. Strax upp úr miðnætti helltist afmælisfílingurinn yfir Orminn og þar með varð ekki aftur snúið. Eftir 10 mínútur er kökutími í stærðfræðinni. Það vill nefnilega svo skemmtilega til að einn nemendanna þar er 16 ára í dag.

en ek heiti Sverrir 08:43

Góður dagur

Sumarið, vel heppnaðir kórtónleikar ásamt KFC.

Hvað getur maður sagt?

en ek heiti Sverrir 22:02

Blogg á nýju sumri

Margt hefur á daga bloggara drifið síðan hann bloggaði á laugardaginn (já, bloggafvötnunin hefur gengið bærilega).

Hæst ber átveislu ársins hingað til um páskahelgina. Hún hófst með rölti bræðranna yfir á Hróa á Hringbraut á laugardagskvöldið, hvar snædd var dýrindisbaka með papriku og rauðlauk.

Eftir páskaeggjaátið hið fyrra á sunnudagsmorgun héldu Lynghagabúar í Akurgerði og snæddu dýrindissvínasteik hjá afa og ömmu. Trifflíið stóð einnig undir vængingum (sem voru miklar). Eftir matinn dró afinn fram silfurhamar frá langafa og Góuegg. Eggið það kom sterkt inn og var alls ekki síðra en páskaeggin frá Nóa og Síríusi sem voru í boði í Vesturbænum. Innvolsið í eggjunum frá Nóa hefur líka farið mjög hrakandi í seinni tíð. Er því ekki ólíklegt að fjölskyldan beini viðskiptum sínum til Helga á næsta ári (ekki getur heldur sakað að bojkotta Kolkrabbann).

Marokkóska páskalambið á Aragötunni um kvöldið kórónaði svo ánægjulegan páskadag.

Götunördaskapur

Ekki þykir bloggara leiðinlegt að sjá gamla Kolasundið merkt inn á kort í glugga á Hafnarstræti 18 við Lækjartorg, en svo nefnir teiknarinn portið á bak við Héraðsdóm, þar sem Kolasundið var hlið Útvegsbankans gamla. Nafnið er þó ekki að finna á korti í Borgarvefsjá.

Kórtónleikar

MR-kórinn er með tónleika í Salnum á eftir kl. 17. Hápunktur tónleikanna verður væntanlega flutningur á all-sérstæðu verki Atla Heimis.

Grillun dagsins

Nú eru bloggin hér á síðunni misáhugaverð og ekki endilega sami hópur sem hefur áhuga á götum og þjóðvegum, stjörnufræði, kennslu og því sem bloggari lætur ofan í sig.

Væri því ekki málið fyrir undirritaðan að slá við öllum þeim í stétt bloggara sem hafa lofað n-þúsundasta lesendanum gulli og grænum skógum og gefa heldur heppnum lesanda t.d. gasgrill eða konfektkassa fyrir að lesa öll blogg mánaðarins?

en ek heiti Sverrir 11:58

Silli og Trilli

Bloggari sá í gær Fjölvabók með teiknimyndahetjunum Silla og Trilla, betur þekktum sem Sylvester og Tweety.

Þorsteinn þýðandi lætur ekki að sér hæða.

Þegar nöfnin voru borin undir menn könnuðust sumir betur betur við Rikk, Tikk og Trikk (frændur Andrésar Andar fyrir 1982-3).

Vídeókvöld

Á vísitasíu sinni um vídeókvöld borgarinnar í gær náði Ormurinn að sjá búta úr Platoon og Heist. Sú fyrrnefnda náði ágætlega því takmarki sínu að vera viðurstyggileg en í þeirri síðari var höfuðglæponinn fullbaktryggður.

Svona fer fyrir þreyttum mönnum sem vilja láta sleggju ráða kasti.

Sólmyrkvinn

Þorsteinn rímfróði hefur sett upp gæðasíðu með upplýsingum um hringmyrkva á sólu 31. maí.

en ek heiti Sverrir 23:50

Ísblogg

Ormurinn smakkaði í fyrsta sinn í gær skafís með pekanhnetum og karamellusósu. Hann reyndist ljómandi góður enda þoldi ísinn það vel að vera etinn þótt hann hefði staðið aðeins frammi í skálinni.

Í ljósi þessa hefur hann verið útnefndur skafís páskanna 2003 af forstöðumanni skafíssstofu. Er því við hæfi að nota hann sem uppistöðu í staðgóðan morgunverð.

Dugnaðarblogg

Bloggari ætlar sér að vera duglegur í dag. Sem betur fer er það yfirgripsmikið hugtak og nær m.a. yfir það að vera duglegur í tölvunni og duglegur að leggja sig (hvort tveggja er á dagskrá).

Föstudagurinn langi er ekkert svo langur

Bloggara er ósáttur við þessa nafngift á deginum í dag. Dagurinn (sólarhringurinn sjálfur) í dag er um 24 klst. (23:56:04,1) rétt eins og hinir föstudagarnir og ef litið er á tímann sem er vel bjart skjóta föstudagar í júní deginum ref fyrir rass. Svo eru margir í páskafríi og því vaknar fólk almennt seinna en aðra föstudaga (og hann einnig styttri að því leyti).

en ek heiti Sverrir 11:36

Bloggað á skírdegi - atvinna

Þetta er þarfur starfi.

Bloggari hefur þó hugsað sér að leita á hefðbundnari mið. Það eru 20 dagar til stefnu.

(Niðurlagið fyrri færslu misheppnaðist.)

en ek heiti Sverrir 18:28

Blogg á skírdegi

Dagurinn í dag hefur að töluverðu leyti farið í tölvuhangs, rétt eins og aðrir dagar í páskafríinu. Bloggari náði samt að drífa sig í bíó í gær að sjá Píanista Polanskis. Myndin var mjög áhrifarík og vönduð í alla staði. Það hefði þó ekki skemmt fyrir ef Pólverjarnir hefðu talað pólsku.

Það er helst að samskiptaarmur Ormsins hafi haldið nafni hans á lofti í fríinu í þessari almennu leti og ólifnaði. Símtal í Þjóðarbókhlöðuna[efstu hæð], tölvupóstsamskipti við nemendur ásamt kennslubókamiðlun hefur verið á dagskrá að ónefndu blogginu.

Síðan er það bakan í kvöld. Aldrei þessu vant þarf Kollur að hræra saman sósuna. Sjáum hvort hann hafi nokkru gleymt.

Vorboðarnir

Hóffíflar blómstra á haugi við Lambhaga og hunangsfluga leitar að bústað við Fálkagötuna.

Nú er vorið komið

Atvinna


en ek heiti Sverrir 18:21

Verkamaðurinn og afætan

Ormurinn rakst á þennan annálaða myndbút á netinu. (Athugið að tengingin er hæg og gæðin lítil.)

en ek heiti Sverrir 12:30

Lykt af þvotti og tölvuleikir

Litli bróðir var duglegur í dag og hengdi nýþvegin sængurföt út á snúru. Þegar bloggari braut þau saman minnti lyktin hann sterklega á tölvuleikina Sim City 2000 og Railroad Tycoon. Eftir skamma umhugsun mundi hann eftir því að þetta voru tölvuleikirnir sem hann spilaði heima hjá Jónatani í 10. bekk en þar var mjög svipuð lykt.

en ek heiti Sverrir 00:22

Veganördablogg

12. tbl. Framkvæmdafrétta Vegagerðarinnar kom inn um lúguna í gær. Þetta tölublað var heilar 8 síður og kemst nærri því að slá öll fyrri tölublöð út í merkilegum upplýsingum, enda ekki á hverjum degi sem birt eru tvö kort yfir helstu stórverkefni á samgönguáætlun 2003-2014.

Eitt af því fyrsta sem Ormurinn rak augun í var stytting hringvegarins í Hornafirði um eina 11 km með nýrri brú yfir Hornafjarðarfljót (enda er gamla brúin (254 m) frá 1961). Af öðrum spennandi vegabótum má nefna veg yfir Hvítá milli Bræðratungu og Flúða, nýjan Gjábakkaveg milli Laugavatns og Þingvalla, ásamt jarögöngum undir Almannaskarð.

Á höfuðborgarsvæðinu mátti einnig sjá margt spennandi, s.s. nýjan Úlfarsfellsveg (430) á 3. tímabili, auk þess sem Sundabraut (450) var teiknuð inn á kort eftir innri leiðinni sem Vegagerðin er spennt fyrir (sem og bloggari) en síður sumir borgarfulltrúar.

Vegnúmerin sjálf eru síðan kapítuli út af fyrir sig. Þótt bræðurnir vissu að Bústaðavegur og Stekkjarbakki væru þjóðvegir í þéttbýli voru þeir ekki með númerin á tæru (sá fyrrnefndi ber númerið 418 en sá síðarnefndi 419). Á kortinu má jafnframt sjá að mesti þjóðvegur landsins, Nesbraut (49), sem gengur iðulega undir heitinu Vesturlandsvegur/Miklabraut/Hringbraut nær eftir Eiðsgranda alla leið út á Seltjarnarnes og endar þar við Heilsugæslustöðina. Jafnframt er nokkuð skondið til þess að vita að Reykjanesbrautin (41) fer undir Nesbrautina í Elliðaárdalnum en endar svo í Ánanaustum við Nesbraut (Hringbraut/Eiðsgrandi).

Á korti Vegagerðarinnar er því samt sleppt að númera þrjá stóra þjóðvegi, einn þeirra reyndar eðli málsins samkvæmt. Þegar bloggari náði í skrá yfir alla þjóðvegi á Íslandi til að athuga hvort Sundabrautin væri ekki örugglega númer 450 rakst hann á veg nr. 470, Fjarðarbraut, sem er samheiti yfir göturnar sem liggja í gegnum Hafnarfjörð frá Reykjavíkurvegi til Ásbrautar. Af þriðja nafntogaða veginum í skránni, Fossvogsbraut (409), er hins vegar lítið að frétta eftir stjórnarskiptin í Reykjavík 1994. Orminum þykir þó sennilegt að farið verði af stað við fyrri áfanga hennar innan tveggja áratuga eftir að farið verður að byggja í Vatnsmýrinni, hvort sem það verða þá göng í gegnum Öskjuhlíðina eða vegur inn með Fossvogi. Ef til vill er 400 milljón króna vegur um Hlíðarfót að samgöngumiðstöð við Reykjavíkurflugvöll aðeins fyrsti áfanginn?

Zombie í fyrramálið

Bloggari hefur ýmsar heimildir fyrir því að nú sé málið að sitja límdur við viðtækið í fyrramálið.

Shanghairiddararnir

Ormurinn fór á nýjustu mynd Chackie Chans í gær. Hún var alls ekki svo slæm.

en ek heiti Sverrir 15:34

Íslandsmet í linsuðu grjónagrauts

Bloggara tókst trúlega að setja Íslandsmet í linsuðu grjónagrauts í gær. Hann var kominn ískyggilega nærri flauelsgrautnum í viðkomu. Bræðurnir skófluðu honum samt í sig með bestu list, enda var grauturinn vel yfir meðaltali í bragðgæðum.

Ekkert páskafrí frá tölvunni

Bloggara hefur tekist vel upp í því að verja páskafríinu á svipaðan hátt og öðrum fríum, þ.e. að hanga lon og don í tölvunni. Reyndar hefur það skilað þeim árangri að allmargir geisladiskar í safni bræðranna hafa verið klónaðir og enn aðrir eignast afkvæmi í formi safndiska. Síðan gerðist það í morgun að Ormurinn hafði uppi á myndbandi Massive Attack, „Teardrop“, sem hann hefur girnst lengi ásamt Tomma og Jenna þættinum „Cruise Cat“. Þessar tvær skrár hefðu ratað beinustu leið í flokkinn „myndbönd mánaðarins“ (ef hann væri enn við lýði).

en ek heiti Sverrir 20:23

Laugardagsblogg

Þá er dimissio afstaðið og páskafríið hafið fyrir alvöru.

Kennarinn varð hálf-hrærður þegar nemendur gáfu honum fullt af stjörnum (m.a. ósæranleikastjörnuna úr SMB) ásamt ljómandi sætu korti í kveðjugjöf í gær.

Aðrir viðstaddir forvitnuðust m.a. um hvort bloggari hafi hugsað sér að kenna stjörnufræði næsta vetur (enda vissara að hafa varan á og velja þá annað valfag). Tíminn einn mun leiða það í ljós. Þó er ljóst að nemendahópurinn í vetur og síðastliðið vor hefur ekki minnkað líkurnar á að af því verði.

Að loknum skyldustörfum í Menntaskólanum (lesist: skráningu vetrareinkunna) fór Ormurinn upp í kosningamiðstöðina í Ingólfsstræti. Þar var hersing stúdentsefna og þóttu menn mishallir undir málstaðinn. Eins og við var að búast vöktu búningar Y-bekkinga mesta lukku enda dimmiteruðu þeir sem vinstri grænir(!), grænmálaðir vinstra megin og hvítmálaðir hinum megin.

Stjörnukortin

Ormurinn ætlar að komast sem lengst áleiðis í dag í því að ganga frá eftir stjörnufræðikennsluna. Því er vel við hæfi að setja á vefinn bæði stjörnukortin sem nemendurnir fengu í vor. (Ath. rúm 300 k að stærð + örlítið grámygluleg eftir skönnunina)

Vetrarhiminn.jpg

Sumarhiminn.jpg

Miller´s Crossing

Eftir annasaman dag í gær leigði bloggari mynd Coen-bræðra frá 1990. Hún stóð vel fyrir sínu.

en ek heiti Sverrir 13:33

Pólitík á kennarastofunni

Flokkurinn er að kynna stefnumál sín á kennarastofunni og á meðan hangir Ormurinn í tölvunni. Í ljósi slagorðs hans í kosningabaráttunni væri þó trúlega skynsamlegra að sýna sig á svæðinu.

Eftir hálftíma eða svo fer kennarinn í páskafríið.

En fyrst er það dimissio.

en ek heiti Sverrir 09:47

Rússnesk veggspjöld

Í gær fóru bræðurnir á skemmtilega sýningu á sovéskum áróðursveggspjöldum í Listasafni Reykjavíkur í Hafnarhúsinu. Mörg þeirra voru mjög áhrifarík og ekki dró rússneskan úr skemmtanagildinu þegar farið var að leita eftir alþjóðlegu orðunum í textanum.

Taóisti á kennarastóli

Ormurinn þreytist seint á að dásama þolinmæði samstarfsmanns. Nýjasta lögmálið hljóðar svo: „Vandamál hafa tilhneigingu til þess að leysast“ og nefndi kennarinn tvö dæmi frá því í dag máli sínu til stuðnings. Hann hefur áður fengið birt véfréttarlögmál sitt varðandi umsagnir um þokkalega fyrirlestra („Margt kom vel fram“).

Ísbíltúr

Í ísbíltúr áðan sannreyndi bloggari að honum þykir ísinn á Hagamelnum betri en sá sem er boðið upp á í Álfheimum.

en ek heiti Sverrir 01:40

Kaka kemur í köku stað

Í þessum skrifuðum orðum er skúffukaka að bakast í ofninum. Þessi er handa M-bekkingum, enda stýrir bloggari næstsíðustu kennslustund þeirra í MR á morgun. Ef til vill er þetta skáldlegt réttlæti í ljósi þess að undirritaður sporðrenndi síðustu sneiðinni af sunnudagskökunni hennar ömmu fyrr í dag.

Eðlisfræðikennsla

Ormurinn fékk að grípa í eðlisfræðikennslu í dag í forföllum. Það var ekki ónýtt þótt á dagskránni væru einungis ljósfræðidæmi, þar sem linsujafnan var í aðalhlutverki.

ADSL-vesen

Bræðurnir eru farnir að hugsa sér til hreyfings í sambandsmálinu hinu síðara.

Áðan lá bloggari í 50 mínútur í símanum við að heimta skýringar af Landssímanum á truflunum á netsambandinu.

Landssíminn er ekki einungis undir getu í þessu máli, hann er hreinlega að standa sig illa.

en ek heiti Sverrir 23:54

Rólegt blogg á rólegum degi

Dagurinn í dag er rólegur. Fáir tímar í skólanum og fátt aðkallandi á dagskránni. Markmiðið er þó sett hátt, þ.e. að ganga frá einkunnum fyrir ritgerðir/fyrirlestra og veturinn hjá stúdentsefnunum. Nú væri ekki verra að bloggari byggi yfir nokkurra ára reynslu af því að meta fyrirlestra en því er víst ekki að heilsa. Veturinn í vetur verður að duga (ásamt fyrirlestrum samnemenda síðasta áratuginn).

Í kvöld er hugmyndin að horfa á stórleik Manchester United og Real Madrid. Nokkur skjálfti er í Orminum enda Madridingar illir viðureignar.

en ek heiti Sverrir 11:43

Kaka í skólanum, kaka í kvöldmatinn

Í dag var síðasta kennslustundin hjá RU-stjörnufræðibekknum. Þrír fyrirlestrar voru fluttir og svo sýndi nemandi myndband um Apolló 11 leiðangurinn. Einn fyrirlestranna var um geimferðaáætlun Rússa og til að kóróna allt þá fékk kennarinn ritgerð í hendurnar um Werner von Braun og eldflaugarnar hans. Önnur er síðan væntanleg um upphaf eldflaugaáætlunar Bandaríkjamanna.

Ekki spillti svo fyrir að tekið var kökuhlé þar sem viðstaddir gæddu sér á bollum, kökum og pönnukökum. Nemendur kunnu sig og hrósuðu köku kennarans. Það er alltaf góðs viti á þessum síðustu og verstu tímum vetrareinkunnagjafar.

Í strætóskýlinu eftir skóla hitti Ormurinn fyrir bróður sinn, heldur framlágan, eftir vökunótt og fyrirlestur.

En ætli það sé ekki best að halda áfram með kvöldmatinn frá afa og ömmu?

en ek heiti Sverrir 21:16

Viðburðarík helgi

Á föstudaginn fór Ormurinn í fyrsta sinn á MORFÍS. Rimman var jöfn og því meira svekkjandi en ella að horfa upp á Verslingana vinna. Ræðumaður Íslands, Jóhann Alfreð Kristinsson, var firnagóður. Hér er úttekt oddadómarans á viðureigninni. Eftir þetta var tekið hús á afmælisfagnaði á Nesveginum, þar sem gestir skemmtu sjálfum sér og öðrum með karókísöng (mætti prófa það einhvern tíma á Lynghaganum).

Eftir að hafa legið í bleyti í Árbæjarlauginni seinnipartinn í gær, snæddi bloggari gómsæta grillpinna og hélt svo á Nóa Albínóa í Háskólabíói. Myndin sú er tvímælalaust með bestu íslensku kvikmyndunum sem bloggari hefur séð.

Í hádeginu í dag snæddu bræðurnir kjúkling og köku í Akurgerðinu. Svo tók við kóræfing þar sem lag Atla Heimis sló í gegn hjá bloggara. Áheyrendur á sumardaginn fyrsta skyldu samt spenna á sig sætisólarnar.

en ek heiti Sverrir 19:24

Hraðbraut í fóstur

Fyrir nokkrum árum stóð yfir landgræðsluátak þar sem mátti taka flag í fóstur (rétt eins og ónefndur kvikmyndagerðarmaður hét að gera).

Í Vesturheimi hafa menn þó bætt um betur en þar er hægt að taka hraðbraut í fóstur.

en ek heiti Sverrir 21:38

Morfís

Snabbinn keypti í dag miða fyrir bræðurna á Morfís annað kvöld. Þetta verður þar með fyrsta opinbera ræðukeppnin sem bloggari fer á (fór reyndar ´95 á nýliðakeppni MR og MH). Þó hefur hann séð nokkrar bekkjarkeppnir í MR og er reyndar ósigraður í ræðumennsku eftir að 3.O vann 3.G en Ormurinn var liðsstjóri O-bekkjarins.

MP3 tölvan

Bloggari reyndi nýju græjurnar í Cösu í dag. Þær koma sterkar inn.

en ek heiti Sverrir 15:28

Skriftagangur

Ormurinn festi kaup á geislaskrifaranum í dag. Honum líður eins og nýjum manni, nýtt lyklaborð og nýr skrifari.

Kvöldmatur

Bloggari mundi eftir kvöldmatnum áðan og hafði sig í að elda grjónagraut.

Þar með er komið nesti fyrir vinnuna á morgun.

Nemendur

Rimskælingar spurðu Orminn í dag hvort hann vildi ekki vera töff kennari. Kennaralúðinn er nú frekar málið, sérstaklega þar sem víst var að beiðni um frí væri næst á dagskrá.

Kennara þótti gaman að sjá að enn einn nemandi er farinn að blogga. Þeir eru nú þrír í stjörnufræðinni.

en ek heiti Sverrir 23:11

Íslensk ljósmynd á APOD fyrir 1 ári síðan

Hér er slóðin á ægifagra mynd af norðurljósunum sem Sigurður H. Stefnisson tók.

Svo er önnur mynd af sama vef sem er frekar í ætt við daginn í dag.

en ek heiti Sverrir 22:23

Bloggað úr heimahúsi

Ormurinn bloggar nú af Lynghaganum þar sem fremri gangurinn er fullur af pokum eftir teitina. Tiltekt lýkur með lokaáhlaupi annað kvöld.

Hann er kominn með nýtt lyklaborð í hendurnar eftir að Forsetinn skutlaði honum í nýju, glæsilegu Applebúðina í Brautarholtinu. Bloggari vill jafnframt blása á efasemdir sumra um framtakið. Svo er það skrifarinn í kvöld.

Nokkuð fyndið að sigurvegarinn í söngkeppni framhaldsskólanna og fyrirliði MR-liðsins í GB skuli bæði hafa hampað Hljóðnemanum og átt afmæli.

Mallakúturinn

Ormurinn smellti á slóð á arabískt blogg á Bloggernum fyrr í dag (enda lítið annað hægt að gera). Bloggið og heimasíðan, sem vísað var á neðst á því, eru með ansi kostulega slóð.

Aprílgöbb

Ormurinn lætur oftast glepjast. Dagurinn í dag er þar engin undantekning. Kennarinn ákvað samt að stilla sig um að senda nemendur upp á skrifstofu „eftir ljósritum“.

Ættfærsla

Í teitinu um helgina fékk bloggari að sjá andlitin á ýmsum sem hann kannast bara við í gegnum bloggin. Einn þeirra er Gvendurinn, hverjum Ormurinn var samferða í bíl Höskuldar vestur í bæ. Það var þó ekki fyrr en nokkrum klukkustundum seinna að það kom í ljós hverra manna hann var, en undirritaður hafði einmitt rekist á systur hans og fyrrverandi bekkjarsystur í X-inu fyrr um daginn. Það bætti þó úr skák að bloggari tók hinn sessunaut systurinnar með sér í fallinu.

en ek heiti Sverrir 19:50