Yndislega skyndipróf

Í dag þarf ekkert að sussa á nemendurna. Það eru heldur engar 2x35 mínútur sem fara í að þreyta hendina með því að skrifa upp á töflu. Kennarinn getur bloggað að vild eða varið tímanum til þess að klára heimadæmi dagsins.

Í dag er skyndipróf.

en ek heiti Sverrir 14:43

Atkvæðaveiðar

Ormurinn hefur ákveðið að slá litla bróður og Óla Gneista við og bjóða atkvæði sitt til sölu á litlar 8.500 krónur með þjónustu í Heimdallarkosningunum. Þjónustan yrði þá veitt af hálfu kaupanda, sem myndi skrá bloggara úr Flokknum eftir kosningarnar, en undirritaður kæmi sér sjálfur á staðinn.

Án þjónustu færi atkvæðið á eitthvað hærra verði, en annars er bloggari opinn fyrir öllum tilboðum.

Tiltekt

Bloggari hefur setið með sveittan skallann í kvöld við að taka til í gömlu dóti.

Meðal þess sem fór í blaðagám áðan var 2000-árgangurinn af Economist, gamla frjálshyggjublaðið „Efst á baugi“, nokkrir árgangar af Vélabrögðum frá hinum og þessum kynningum og sýningum (gömlum Verplum var samt haldið eftir), ásamt fyrsta tölublaði „Hamhleypunnar“ með viðtali við Júlíus Kemp um kvikmyndina Blossa 810551. Ormurinn mat það samt svo að gaman væri að eiga áfram tölublað X-tra blaðsins um tónlistarhátíðina Uxa ´95. Ekki merkilegt, en sómir sér samt vel í sama tímaritavasa og Miklagarðstíðindin.

Bloggari hikaði við að taka til hendinni í safni ljótustu sólgleraugna norðan Alpafjalla (m.a. tvenn rauð X-Men sólgleraugu) en það er greinilega grisjunar þörf.

en ek heiti Sverrir 23:32

Öryggisráðið

Það er einn plús varðandi þetta streð við að komast í öryggisráðið.

Reksturinn á fastafulltrúanum yrði mjög ódýr (þráðlaus tenging við atkvæðagreiðslukerfi Bandaríkjanna+gína).

Það er þó annað en þessi nýi sendiherrabústaður í Berlín.

en ek heiti Sverrir 19:31

Kindin hjá Kolaportinu

Það var fyrst núna í vikunni að bloggari sá kind út úr ofur-pixeluðu myndinni þar sem rampurinn var upp á bílastæðið hjá Tollhúsinu.

Ormurinn er þeim mun stoltari í ljósi þess að honum hefur aldrei tekist að sjá þrívíddarmynd birtast upp úr tölvumyndunum þar sem á að affókusa. Í 4. bekk í menntó var hann t.d. annar af tveimur í bekknum sem sá ekkert nema línur út úr forsíðumyndinni á skólablaðinu. Hinir sáu jörði rísa úr ægi, iðjagræna.

en ek heiti Sverrir 19:06

Málað í sjónvarpinu

Þótt það sé lítið sem þurfi að gera í nýju íbúðinni, þá verður seint sagt að það gangi jafnvel eins og í kvikmyndunum og sjónvarpsþáttunum.

Til þess að ná því hefði vinnan þurft að taka í mesta lagi 3 mínútur (tíminn sem eitt stk. popplag tekur). Kærustuparið hefði þurft að sletta málningu hvort á annað a.m.k. einu sinni (en ekki skima gólfið vandlega eftir minnstu dropum), vinirnir hefðu þurft að koma tvisvar sinnum með pitsu og við í flutningunum hefði klaufinn í vinahópnum þurft að setja hlut á asnalegan stað (t.d. standlampa inn á bað).

Ekkert af þessu hefur gerst (ennþá), ekki það að parið sakni þess. Það er helst vinum sé velkomið að mæta með pitsu á svæðið (og enn er tækifæri fyrir klaufann, þar sem flutningarnir verða ekki fyrr en um næstu helgi).

Skipulag miðborgarinnar

Ormurinn fór á sýningu skipulagshugmynda fyrir miðborgina í húsnæði Verslunarbankans í Bankastræti í gær. Hugmyndirnar virtust misgóðar. Hugmyndin um að ráðuneytunum verði hrúgað á Stjórnarráðsreitinn var lítið spennandi (síðan hvenær hafa húsnæðismál ráðuneytanna reyndar verið það?), en Höfðaborgarreiturinn við Borgartún, Skuggahverfið og blokkirnar við Snorrabraut öllu meira spennandi.

en ek heiti Sverrir 20:16

Rólegur dagur

Á miðvikudögum eru hvorki tímar í HÍ né MR. Dagskráin fyrir kvöldmat hljóðar því upp á að spasla, reikna nokkur dæmi og bæta síðum við heimasvæðið hjá MR.

Allt stefnir þó í að þá verði þetta meira spennandi. Húsmóðirin ætlar að elda mexíkanskan mat (ekki mexíkóskan) og eftir hann fer parið á Nesveginn og hefur lakkvinnu fyrir alvöru.

en ek heiti Sverrir 15:03

Nýklipptur og sætur

Ormurinn nýtti sér háskólatilboð í klippingu á hárgreiðslustofunni á Hótel Loftleiðum í gær. Þegar hann gekk út rann upp fyrir honum að hann hafði ekki farið í klippingu á Íslandi síðan í febrúar (reyndar fór hann í klippingu í London í maí).

Í gærkvöldi kom svo í ljós að konunum í lífi bloggara leist alls ekki svo illa á klippinguna.

Þegar mamma segir „Það var ekki tekið jafnmikið eins og síðast“ þá er það góðs viti.

Egg standa á endanum

Stjörnufræðimynd dagsins sýnir egg standa uppi á endann á jafndægri að hausti.

Sá sem stendur fyrir þessu gríni (egg standa jú ekkert frekar upp á endann á þessum degi frekar en öðrum) er „slæmi stjörnufræðingurinn“, sem heldur úti þeirri stórkostlegu síðu Bad astronomy.com.

Á þessari síðu ræðst hann á ýmsan útbreiddan misskilninginn, s.s. af hverju himinninn er blár, af hverju það eru árstíðir o.fl. Það er alveg drepfyndið hvernig sumir skýra (ranglega) bláan lit himinsins.

Víst Ormurinn er byrjaður á þessu linkabloggi, þá er hér fróðleg síða sem nemandi benti bloggara á um „þotuna“ sem flaug á Pentagon.

en ek heiti Sverrir 14:19

Spasl 101

Unga parið er komið á fullt skrið við að dytta að íbúðinni á Nesveginum. Þar er ekki margt að vinna. Helst að það þurfi að skipta um nokkra lista og ljósarofa, lakka dyrakarma og mála 1,1 vegg.

Í dag fékk parið leiðbeiningar um meðferð lakkeyðis og spasls.

Reyndar eru aðeins tvær vikur í flutningana, svo það er vissara að halda sér við efnið.

en ek heiti Sverrir 22:00

Björn

Fátt nær að koma Orminum úr jafnvægi þessa dagana. Sem dæmi um það eru viðbrögðin þegar hann sá Morgunblaðið í dag, þar sem stóð í forsíðuhausnum:

„Sérblaðið Björn hefur göngu sína“

Nú, nú, þá er Björn Bjarna kominn með nýjan vettvang til að básúna skoðanir sínar, var það fyrsta sem bloggari hugsaði.

Við nánari skoðun kom reyndar í ljós að þarna stóð Sérblaðið Börn hefur göngu sína á ný.

Hitt hefði svo sem engum komið á óvart.

Bad Boys II

Fáar myndir hafa átt jafn-vel skilda umsögnina „góður skítur“, enda orðbragð söguhetjanna óheflað með afbrigðum óheflað.

Svo bloggari vindi sér beint í bókmenntafræðina, þá voru ábyrgðarlausu löggukjánarnir og hvítklæddi eiturlyfjabaróninn bíógestum vissulega að góðu kunnir úr fjölmörgum myndum. Það voru hins vegar tvær vondukallatípur sem vöktu meiri eftirtekt hjá Orminum.

Annars vegar er um að ræða drykkfellda rússneska mafíósann sem mætir til hefnda með vodkaflöskuna í strengnum og þvaðrar um Móður Rússland. Þessi típa er beinlínis vond.

Vondi glæpamaðurinn með dreddana stóð hins vegar undir greiðslunni, svipað og gaurarnir í Matrix II. Þessir samsynar hvíta tjaldsins eru últrasvalir.

en ek heiti Sverrir 19:13

Ignis kæliskápar

Ótrúlegt að hafa ekki komið auga á mótsögnina fyrr.

Hvað ætli hafi leitt þá Ignis-menn út í kæliskápasmíði?

en ek heiti Sverrir 18:42

GF heilsu grill

Ef það er einhver auglýsing sem fær bloggara til að missa matarlistina, þá er það auglýsingin

„Loksins á Íslandi – George Foremann™ heilsu grill.

Kýldu fituna burt! Foreman rotar keppinautana.“

Svo steytir digur hnefaleikakappinn hnefann í bakgrunni.

Dagurinn

Annars hefur dagurinn liðið án stórtíðinda. Ormurinn spjallaði reyndar við tvo gamla bekkjarfélaga úr MR, sem gerist ekki á hverjum degi.

Í kvöld er myndakvöld með myndum úr kórferðinni til London. Þann atburð verður gaman að rifja upp.

en ek heiti Sverrir 16:10

Tóga

Það blæs köldu á 6. bekkinga við tolleringuna í dag.

Allt verður það samt gleymt eftir að menn hafa hesthúsað skúffuköku og drukkið með ískalda mjólk eftir athöfnina.

Í kvöld er busadansleikurinn haldinn á skemmtistaðnum NASA. Á sokkabandsárum Ormsins dunaði dansinn í Tunglinu (haustið 1995) og á Ingólfscafé (haustið 1999).

Síðan það gerðist hefur mikið vatn runnið til sjávar og báðir skúnkastaðir eru fyrir bí. Brátt verður svipað að minnast á þá eins og Glaumbæ, Sigtún og Röðul (vissulega hefur nafnatískunni hrakað!).

en ek heiti Sverrir 10:15

Afmæli

Bloggara veitist sá heiður í kvöld að mæta í ammæli hjá manni, sem kemur alla leið frá Danmörku til að halda upp á ammælið. Það verður gaman að fá að heyra ferðasöguna og gæða sér á gómsætu góðgæti.

Leiðari Morgunblaðsins

Bloggari er ekki frá því að leiðari Morgunblaðsins í dag um samgöngur í höfuðstaðnum komi skemmtilega á óvart. Eins er hugmyndin um að framhaldsskólanemar fái ókeypis í strætó eða greiði lágt fargjald (á ákveðnum tímum dagsins) góðra gjalda verð.

Í nýjasta tölublaði Framkvæmdafrétta eru sýndar tölvuteiknaðar myndir af fyrirhuguðum göngubrúm á Njarðargötu og Hringbraut (eftir flutning suður fyrir Læknagarð og BSÍ). Ef það er eitthvað í samgöngumálum sem höfðar mest til bloggara, þá er það væntanlega brúarsmíði. Þessar göngubrýr líta vel út (a.m.k. á myndinni) og er öllu léttara yfir þeim en brúnum á Miklubraut og Hafnafjarðarveginum. Það var reyndar ljóst að ekki væri sama pláss fyrir jarðvegsfyllingar í Vatnsmýrinni og á hinum stöðunum. Menn aka grjótinu þá bara á tipp í staðinn.

Það sem er þó (bráðum) í hendi í brúargerð er Þjórsárbrúin nýja, stórglæsilegt mannvirki, ásamt tveimur göngubrúm við Stekkjarbakka og Goðatorg í Hafnarfirði.

Á þeirri fyrrnefndu eru álíka mörg höf og á gömlu brúnni yfir Jökulsá á Sólheimasandi. Þar verður gaman að plampa yfir.

Síhringjandi síminn

Nú er gaman að geta svarað „hjá Eyjólfi Guðmundssyni“ í símann, svipað og heimilisfaðirinn tók upp á þegar undirritaður var í 10. bekk (og þótti fyndið). Næsta skref er að unglingurinn fái headsett undir derhúfuna (eitthvað hefur reyndar dregið úr derhúfunotkun eftir að ungmennið fluttist til kaldari landa.)

en ek heiti Sverrir 15:35

Tölvupóstur í beinni

Myndvarpavæðing framhaldsskólanna hefur sína ókosti fyrir sauði í safni kennara.

Í dag mætti kennarinn í G-stofu skömmu áður en hringt var inn og hóf að lesa tölvupóst. Ekki leið á löngu fyrr en það heyrðist pískur úti í bekk og það á sama tíma og bloggari var að skoða myndir úr Lundúnarferðinni.

Það rættist þó heldur úr þessu myndvarpamáli þegar kennara var litið á stjörnufræðimynd dagsins af fellibylnum Ísabellu. Hún er ekki fjarri því að falla í flokk fimm með stærstu fellibyljunum (með þessum).

en ek heiti Sverrir 11:02

Elkó-blaðið

Fyndinn þessi örn framan á blaðinu í dag undir fyrirsögninni „Þú sérð ekki betra verð“. Vissulega eru ernir fráir vel en ekki keppa þeir við haukana í þeim efnum.

Í sama blaði er mynd af Nokia-síma. Á þeim bænum nota þeir myndbrot úr „Guð gefur Adam líf“ og skeyta undir „Nokia - Connecting People“. Þessir menn eru þeir svölustu í bransanum.

Pési eða makki?

Bloggari stóð í rifrildi í dag, sem tók fljótt á sig hið gamalkunna form „Hvort eru PC eða Macintosh-tölvur betri?“. Reyndar var þetta ansi gaman, þar sem andstæðingurinn (ath. ekki viðmælandi!) byrjaði á því að skjóta sig í fótinn. Að segja að það væru ekki til nein almennileg forrit fyrir Macintosh, s.s. Photoshop, fellur vissulega undir þá skilgreiningu í huga Ormsins.

Skemmtilegustu deilurnar í þessum flokki deilna, sem bloggari hefur orðið vitni að, voru samt þegar tveir menn á fertugsaldri stóðu í PC-makka rifrildi í Þessalóniku haustið 1999. Það væri óskandi að undirritaður mætti standa í slíku að 10 árum liðnum.

Vegamót þjóðvega 40 og 49

Nú er bara eins og að vera kominn til útlanda að keyra um gatnamót Kringlumýrarbrautar og Miklubrautar. Í fyrsta lagi eru það umferðarljósin komin með framlengingu þannig að nú eiga bílstjórar nr. 6 og 7 möguleika á að fylgjast með því hvað er að gerast á ljósunum. Í annan stað er búið að setja upp fyrstu stálgrindurnar á Íslandi fyrir röð gangandi vegfarenda. Slíkt ljær gatnamótunum svo sannarlega evrópskan blæ.

Blogghlé

Bloggari hefur verið í stífu blogghléi síðustu tvær vikurnar og bíður hans nú hálfs mánaðar lesning á hinum ýmsu síðum. Hefur hann fyrir satt að t.d. Viðar, Ármann og Stefán séu búnir að blogga margt forvitnilegt.

Óvíst er þó um hvenær Ormurinn kemst yfir þetta fjall blogga, enda er hann kominn með í hendurnar lykla að risíbúð á Nesvegi 66, en þangað stendur til að flytja saman með Ósk eftir tvær til fjórar vikur.

Eins hefur vinnan við heimasíðu stjörnufræðinnar í MR tekið sinn hluta af mögulegum nettíma.

Jæja, best að standa upp frá tölvunni og reikna heimadæmi.

en ek heiti Sverrir 21:45

Teppabúðin

Bloggari fór með Forsetanum og Svanssyni á myndina Bloody Sunday um samnefndan atburð. Myndin var góð og varpaði ljósi á tímabil sem Ormurinn er of ungur til að hafa upplifað.

Leiðin heim lá um Suðurlandsbrautina. Þar stendur enn gamla, ljóta Teppabúðarhúsið. Eitt er Orminum ráðgáta: Af hverju er ekki rekinn Paintballsalur, Laser-tag eða Go Kart-braut í húsinu? Það myndi alveg fullkomna svona óhrjálegt „bíður niðurrifs“-hús.

en ek heiti Sverrir 14:05

Hafsjór

Af hverju ætli sé sagt að einhver sé „hafsjór af fróðleik“?

Heill sjór eða eitt stykki haf er greinilega ekki nóg – það þarf eitthvað meira til.

en ek heiti Sverrir 21:50